យោងតាមប្រភពព័ត៌មានថ្មីថ្មី៖ មិនដល់៥ឆ្នាំទៀតទេកម្ពុជានឹងក្លាយប្រទេសចំណូលមធ្យមកម្រិតខ្ពស់នៅឆ្នាំ ២០៣០ ហើយឈានទៅជាប្រទេសចំណូលខ្ពស់នៅឆ្នាំ ២០៥០។ ប៉ុន្តែបើផ្អែកតាមរបាយការណ៍ធនាគារជាតិ នៃកម្ពុជា បច្ចុប្បន្នសេដ្ឋកិច្ចកម្ពុជាគឺនៅតែពឹងផ្អែកខ្លាំងលើប្រាក់ដុល្លារអាម៉េរិករហូតដល់ជាង៨០ភាគរយខណៈទំហំប្រាក់រៀលចរាចរនៅក្នុងសេដ្ឋកិច្ចជាតិមានត្រឹម១៥-២០ភាគរយ។ ប្រសិនបើការប្រើប្រាស់ប្រាក់ដុល្លារនៅតែបន្តមានភាពទូលំទូលាយបែបនេះទៀតនោះ វានឹងប៉ះពាល់ខ្លាំងដល់ការលូតលាស់សេដ្ឋកិច្ចកម្ពុជា។
ក្នុងសិក្ខាសាលាផ្សព្វផ្សាយពីសារៈសំខាន់ប្រាក់រៀលនៅក្នុងសេដ្ឋកិច្ចជាតិ នៅវិមានសភា នាថ្ងៃទី២០ ខែមីនា ឆ្នាំ២០២៥ ទេសាភិបាលធនាគារជាតិ នៃកម្ពុជា លោកជំទាវបណ្ឌិត ជា សិរី ទេសាភិបាល បានបញ្ជាក់ថា ការប្រើប្រាស់ប្រាក់ដុល្លារអាម៉េរិកយ៉ាងទូលំទូលាយដូចបច្ចុប្បន្ននេះ គឺពិតជានាំឱ្យកម្ពុជាងាយរងគ្រោះ។ ជាពិសេសនៅក្នុងពេលដែលមានវិបត្តិសេដ្ឋកិច្ច និងហិរញ្ញវត្ថុ ពេលមានភាពមិនប្រាកដប្រជានៃនយោបាយសហរដ្ឋអាម៉េរិក ការបែកខ្ញែងភូមិសាស្ត្រនយោបាយ និងសេដ្ឋកិច្ច និន្នាការសមាហរណកម្មតំបន់ និងនិន្នាការបដិដុល្លារូបនីយកម្មក្នុងពិភពលោក។
ឆ្លងកាត់នូវវិបត្តិកូវីដ-១៩ នាពេលកន្លងមកបានបង្ហាញថា កម្ពុជាគឺមិនមានលទ្ធភាពអនុវត្តនយោបាយរូបិយវត្ថុបានពេញលេញ និងមិនមានប្រសិទ្ធភាពក្នុងការរួមចំណែកកាត់បន្ថយអត្រាការ និងបញ្ចេញសន្ទនីយភាពច្រើនដើម្បីជំរុញកំណើនសេដ្ឋកិច្ចឡើងវិញបានទេ។ បើតាមលោកជំទាវបណ្ឌិត បញ្ហានេះគឺដោយសារតែនយោបាយរូបិយវត្ថុរបស់ធនាគារជាតិ មានឥទ្ធិពលតែទៅលើប្រាក់រៀលប៉ុណ្ណោះ ហើយក្នុងស្ថានភាពដុល្លារូបនីយកម្មនៅកម្ពុជាមានកម្រិតខ្ពស់ ឥទ្ធិពលនេះត្រូវបានដាក់កំហិតដោយនយោបាយរបស់សហរដ្ឋអាម៉េរិក។
«ជាក់ស្តែង ធនាគារជាតិ នៃកម្ពុជា មិនអាចបន្ថយអត្រាការប្រាក់ជាដុល្លារអាម៉េរិកបានឡើយ ល្គឹកណាអត្រាការប្រាក់របស់សហរដ្ឋអាម៉េរិកមានកម្រិតខ្ពស់»។ នេះជាការលើកឡើងរបស់លោកជំទាវបណ្ឌិត ដែលនាពេលចុងក្រោយនេះ សេដ្ឋកិច្ចកម្ពុជា បានរងគ្រោះពីការដំឡើងអត្រាការប្រាក់គោលរបស់ធនាគារកណ្តាលសហរដ្ឋអាម៉េរិកដែរ ដោយសារតែកម្ពុជាចាយលុយដុល្លារច្រើន។
លោកជំទាវបណ្ឌិត ជា សិរី ទេសាភិបាល ធនាគារជាតិ នៃកម្ពុជា បានបន្តពន្យល់ថា៖ «អាម៉េរិក គេឡើងថ្លៃលុយនៅស្រុកគេ គឺដើម្បីកាត់បន្ថយអតិផរណា។ ដល់យើងខ្មែរនេះលុយដុល្លារក៏ឡើងថ្លៃដែរ ខណៈយើងចង់ឱ្យលុយថោក ព្រោះតែស្រុកយើងទើបងើបចេញពីកូវីដ-១៩ យើងចង់ជំរុញកំណើនសេដ្ឋកិច្ច។ នេះជាឧបសគ្គ! កាលណាសេដ្ឋកិច្ចល្អ ចេះតែទៅមុខទៅ លុយដុល្លារក៏ចេះតែស្រួលដែរ។ ថ្លៃ១ដុល្លារ ៤០៥០រៀល ប៉ុន្តែដល់ពេលសេដ្ឋកិច្ចធា្លក់ចុះ! អាហ្នឹង បានយើងដឹងថា យើងក្លាយជាចំណាប់ខ្មាំងរបស់អាម៉េរិក ពីព្រោះយើងចាយលុយអាម៉េរិក»។
ដើម្បីចាកចេញពីឥទ្ធិពលសេដ្ឋកិច្ចរបស់សហរដ្ឋអាម៉េរិក ប្រជាពលរដ្ឋគ្រប់រូប គួរគម្បីងាកប្រើប្រាស់ប្រាក់រៀលឱ្យបានច្រើន ដើម្បីជួយជំរុញកំណើនសេដ្ឋកិច្ចជាតិ ជាពិសេសគឺជួយធនាគារជាតិ នៃកម្ពុជា ឱ្យមានលទ្ធភាពកាន់តែពេញក្នុងការអនុវត្តគោលនយោបាយរូបិយវត្ថុ ខណៈ២ទសវត្សរ៍ចុងក្រោយនេះ ប្រាក់រៀលរបស់កម្ពុជាគឺមានស្ថិរភាពល្អដោយរក្សាបានតម្លៃលើទីផ្សារក្នុងរង្វង់៤១០០រៀលក្នុង១ដុល្លារអាម៉េរិក។ ចូលដល់ឆ្នាំ២០២៥នេះ ស្ថានភាពប្រាក់រៀលកាន់តែល្អ ដែលមានតម្លៃពី៤០០០-៤០៤០រៀលក្នុងមួយដុល្លារ។ ការចូលរួមពីគ្រប់ក្រសួង-ស្ថាប័នសាធារណៈ និងវិស័យឯកជន នឹងប្រែក្លាយប្រាក់រៀល ទៅជារូបិយវត្ថុចម្បងនៅគ្រប់សកម្មភាពសេដ្ឋកិច្ច និងវិស័យទាំងអស់ ក៏ព្រោះការប្រើប្រាស់រូបិយវត្ថុជាតិ គឺអាចជួយកាត់បន្ថយប៉ះពាល់ពីកត្តាខាងក្រៅ ហើយនឹងធ្វើឱ្យកម្ពុជាមានឯករាជ្យភាពផ្នែកសេដ្ឋកិច្ចកាន់តែខ្ពស់ និងល្អប្រសើរ៕
