យោងតាមសារព័ត៌មានថ្មីថ្មី៖ ឆមាសទី១ បើទោះបីជាប្រឈម នឹងភាពមិនច្បាស់លាស់ពីកត្តាខាងក្រៅខ្លាំងក៏ដោយ តែសេដ្ឋកិច្ចកម្ពុជានៅសម្រេចបានកំណើន ៥,៩ ភាគរយ។ នេះបើយោងតាមរបាយការណ៍ប្រចាំឆមាសទី១ ឆ្នាំ២០២៥ របស់ធនាគារជាតិនៃកម្ពុជា (NBC) ដែលបានបញ្ជាក់ថា កំណើននេះត្រូវបានគាំទ្រដោយ​​​​ ការកើនឡើងនៃវិស័យកម្មន្តសាល ទេសចរណ៍ និងវិស័យកសិកម្ម ខណៈវិស័យសំណង់និងអចលនទ្រព្យ​ បន្តមានភាពទន់ខ្សោយ។

របាយការណ៍ឆមាសទី១​​​​​​​​​​​​​​​​របស់ធនាគារ ​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​ដែលចេញផ្សាយនៅថ្ងៃទី៣១ ខែកក្កដា បានបង្ហាញថា​វិស័យកម្មន្តសាលបន្តដើរតួនាទីយ៉ាងសំខាន់ក្នុងការទ្រទ្រង់កំណើនសេដ្ឋកិច្ចកម្ពុជា ដោយមានកំណើន ៩,៥ភាគរយ។ អនុវិស័យកម្មន្តសាលកាត់ដេរ ត្រូវបានប៉ាន់ស្មានថាកើនឡើងក្នុងអត្រា​ ១០,៤ភាគរយ ស្របពេលដែលអនុវិស័យកម្មន្តសាល មិនមែនកាត់ដេរកើនឡើង ៨,៥ភាគរយ។

ធនាគារជាតិបានបញ្ជាក់ថា ការនាំចេញផលិតផលកម្មន្តសាល គឺបានកើនឡើងគួរឱ្យកត់សម្គាល់ ក្នុងអត្រា១៥,៣ភាគរយ​នៅឆមាសទី១ ធៀបនឹងគ្រាដូចគ្នាកាលឆ្នាំ២០២៤ មានត្រឹម៨,៧ភាគរយ។ កំណើនេះ បានដោយសារការសម្រុកនាំចេញយ៉ាងគំហុកមុនពេលពន្ធគយបដិការរបស់សហរដ្ឋអាម៉េរិកត្រូវបានអនុវត្ត ចាប់ពីថ្ងៃទី១ ខែសីហា តទៅ។ បើតាមរបាយការណ៍ដដែល កំណើននេះ គាំទ្រចម្បងដោយការនាំចេញផលិតផលកាត់ដេរ និងផលិតផលដែលកំពុងលិចឡើង ដូចជា សំបកកង់រថយន្ត អំពូលភ្លើង និងខ្សែភ្លើង និងបង្គុំខ្សែភ្លើង។​

សម្រាប់វិស័យទេសចរណ៍ បន្តមានកំណើនដែលឆ្លុះបញ្ចាំងតាមរយៈការកើនឡើងនៃភ្ញៀវ អន្តរជាតិនិងទេសចរក្នុងស្រុក។ កំណើននេះ ត្រូវបានគាំទ្រដោយការអភិវឌ្ឍហេដ្ឋារចនា-សម្ព័ន្ធសំខាន់ៗ និងការតភ្ជាប់ជើងហោះហើរ ត្រង់ជាមួយបណ្តាប្រទេសនានា ក៏ដូចជាការរៀបចំព្រឹត្តិការណ៍ធំៗដែលចូលរួមទាក់ទាញ អ្នកទស្សនា។ ភ្ញៀវអន្តរជាតិកើន ៦,២ភាគរយ ដល់ ៣,៤លាននាក់ ដែលក្នុងនោះ ភ្ញៀវថៃឈរនៅលំដាប់ទី១ ស្មើនឹង២៧,៦ភាគរយ នៃភ្ញៀវទេសចរអន្តរជាតិសរុបមកកម្ពុជា ក្នុងឆមាសទី១។​ បន្ទាប់មក វៀតណាម និងទេសចរជនជាតិចិន។​

ភ្ញៀវអន្តរជាតិដែលចូលមកតាមផ្លូវអាកាស (សមាមាត្រ ៤២,៣ភាគរយ នៃភ្ញៀវអន្តរជាតិ សរុប) កើន ២៣,៧ភាគរយ និងតាមផ្លូវគោកនិងផ្លូវទឹក (សមាមាត្រ ៥៧,៧ភាគរយ​) ថយ ៣,៧ភាគរយ។ ទន្ទឹមនេះ កម្ពុជារំពឹងទទួលបានភ្ញៀវអន្តរជាតិប្រមាណ ៧,២ ទៅ ៧,៥ លាននាក់ នៅដំណាច់ឆ្នាំ២០២៥។ ការរំពឹងបែបនេះ ដោយសារការគាំទ្រជាចម្បងដោយវិធានការសំខាន់ៗរបស់រាជរដ្ឋាភិបាល ជាពិសេសការដាក់ឱ្យដំណើរការ អាកាសយានដ្ឋានអន្តរជាតិតេជោ ដែលនឹងអាចទទួលអ្នកដំណើរបានរហូតដល់ ១៣ លាននាក់ ក្នុងមួយឆ្នាំក្នុងដំណាក់កាលទី១។ 

ក្នុងនោះផងដែរ ចំណូលទេសចរណ៍អន្តរជាតិត្រូវបានប៉ាន់ស្មានថា ទទួលបាន១,៩ពាន់លានដុល្លារអាម៉េរិក កើន ៩,១ភាគរយ ធៀបនឹងឆមាសទី១កាលឆ្នាំ២០២៤ ខណៈចំណូលពីការលក់បណ្ណចូលទស្សនារមណីយដ្ឋានអង្គរទទួលបាន ២៦,៣ លានដុល្លារអាម៉េរិក។ ជាមួយគ្នានេះ ទេសចរក្នុងស្រុកបន្តកើន ៥០,៣ភាគរយ ដល់ ១៤,៦ លាននាក់។ រាជធានីភ្នំពេញ ឈរនៅលំដាប់ទី១ ជាតំបន់ដែលទទួលទេសចរច្រើនជាងគេ ដែលមានសមាមាត្រ ៣៨,៤ភាគរយនៃទេសចរ ក្នុងស្រុកសរុប។ ទី២ គឺតំបន់ឆ្នេរ (៣៦,៦ភាគរយ) ខណៈខេត្តសៀមរាបឈរនៅលំដាប់ទី៣ (១៦ភាគរយ) និង តំបន់អេកូទេសចរណ៍ឈរនៅលំដាប់ទី ៤ (១,៩ភាគរយ​)។

ចំពោះ វិស័យកសិកម្មបន្តទទួលបានកំណើន ១,២ភាគរយ។ កំណើននេះគាំទ្រដោយកំណើនផលដំណាំ និង ធនធានជលផល។ បើរបាយការណ៍ធនាគារជាតិនៃកម្ពុជា ផលស្រូវរដូវប្រាំងបានកើន ១០,៩ភាគរយ ធៀបនឹងគ្រាដូចគ្នាឆ្នាំ២០២៤ (កើន ១២,១ភាគរយ) ដល់ ៤,៣ លានតោន ។ ការណ៍នេះ ដោយសារ ភាពអំណោយផលនៃអាកាសធាតុ និងការអភិវឌ្ឍ ប្រព័ន្ធធារាសាស្ត្រ។ ទន្ទឹមនេះ ការកើនឡើងនៃ ថ្លៃស្រូវ នាឆ្នាំ២០២៣-២០២៤ ក៏បានរួមចំណែកជំរុញការដាំដុះផងដែរ។ លើសពីនេះ ផ្ទៃដីដាំដុះ ស្រូវរដូវវស្សាក៏បានកើន ៤,៤ភាគរយ ធៀបនឹងឆមាសទីឆ្នាំមុន គឺធ្លាក់ចុះ៧,៥ភាគរយ។

ផលជ័រកៅស៊ូកើនឡើង ១,៣ភាគរយ ដល់ ១៤២,៥ ពាន់តោន ដោយសារកំណើនតម្រូវការ ស្របពេលតម្លៃជ័រកៅស៊ូជាមធ្យមបន្តកើនឡើងខ្ពស់ ៣០,១ភាគរយ ដល់ ១ ៩៨៦ ដុល្លារអាម៉េរិក ក្នុងមួយតោន។ តម្លៃនេះ ធៀបនឹងឆមាសទី១ឆ្នាំ២០២៤ មានតម្លៃត្រឹម ១ ៥២៣ ដុល្លារអាម៉េរិក ក្នុងមួយតោន។​

រីឯ ធនធានជលផលបានកើនដល់១៥,៨ភាគរយ បន្ទាប់ពីថយចុះ ៣,៧ភាគរយ កាលពីគ្រាដូចគ្នាឆ្នាំ២០២៤។  ក្នុងនោះ ផលនេសាទទឹកសាបនិងសមុទ្របានកើន ២៣,២ភាគរយ  ដែលជាចម្បងដោយសារការពង្រឹង វិធានការទប់ស្កាត់សកម្មភាពនេសាទខុសច្បាប់ ស្របពេលដែលផលវារីវប្បកម្ម កើន ៦ភាគរយ​។

តែយ៉ាងណាមិញ វិស័យអចលនទ្រព្យនៅកម្ពុជា​បន្តមានកំណើនទាប ០,៨ភាគរយ។ ការណ៍នេះ ដោយសារការធ្លាក់ចុះនៃថ្លៃ និងទំហំឥណទាន សម្រាប់លំនៅឋាន ស្របពេលដែលការវិនិយោគផ្ទាល់បរទេសក្នុងវិស័យនេះធ្លាក់ចុះ។ ធនាគារជាតិនៃកម្ពុជា បានបញ្ជាក់ថា សន្ទស្សន៍ថ្លៃ លំនៅឋាន (RPPI) រួមថយចុះជាមធ្យម ៣,៦ភាគរយ ដែលក្នុងនោះ នៅរាជធានីភ្នំពេញនិងតាមបណ្តាខេត្ត បានថយ ៣,៦ភាគរយ និង ៧,១ភាគរយរៀងគ្នា។ ជាមួយគ្នានេះ ទំហំឥណទានសម្រាប់លំនៅឋានបែងចែក តាមប្រភេទ សមាមាត្រ ៤៨,៦ភាគរយ នៃឥណទានសរុបបានថយចុះប្រមាណ ១៧,២ភាគរយ។

ជារួម ទោះក្នុងស្ថានភាពសេដ្ឋកិច្ចកម្ពុជាប្រឈមនឹងភាពមិនច្បាស់លាស់ក្តី ក៏ប៉ុន្តែនៅឆមាសទី១ កម្ពុជាសម្រេចបានក្នុងអត្រា៥,៩ភាគរយ។ កំណើននេះ បានដោយសារការកើនឡើងនៃវិស័យ កម្មន្តសាល ទេសចរណ៍ និងកសិកម្ម។ ចំណែកឯ អត្រាអតិផរណាមានកម្រិត ៣,៥ភាគរយ ដែលបណ្តាល មកពីកំណើនថ្លៃក្រុមម្ហូបអាហារ និងអតិផរណាស្នូល ខណៈថ្លៃក្រុមទំនិញនិងសេវាពាក់ព័ន្ធនឹង ប្រេងឥន្ធនៈបានថយចុះ។ អត្រាប្តូរប្រាក់មានកម្រិតជាមធ្យម ៤ ០១១ រៀលក្នុងមួយដុល្លារ ដោយប្រាក់រៀលបានឡើងថ្លៃ ១,៦ភាគរយ ធៀបនឹងគ្រាដូចគ្នាឆ្នាំ២០២៤។  នេះជាអះអាងរបស់ធនាគារជាតិ​ដែលសមតុល្យជញ្ជាំងទូទាត់មានអតិរេក ២៧៥,៥ លានដុល្លារ គាំទ្រជាចម្បងដោយលំហូរចូលសុទ្ធនៃគណនីហិរញ្ញវត្ថុ។ ទន្ទឹមនេះ ទុនបម្រុងអន្តរជាតិបានកើនឡើងដល់ ២៤,៨ពាន់លានដុល្លារ ស្មើនឹង ៧,៥ខែ នៃការនាំចូលទំនិញនិងសេវាសម្រាប់គ្រាបន្ទាប់។

លើសពីនេះ ប្រព័ន្ធធនាគារនៅកម្ពុជា គឺបន្តរក្សាបានភាពធន់ និងបានរួមចំណែកគាំទ្រសកម្មភាពសេដ្ឋកិច្ច ដែលឆ្លុះបញ្ចាំងតាមរយៈកំណើនទ្រព្យសកម្មមាន៧,៣ភាគរយ កំណើនឥណទានមាន២,៩ភាគរយ និងកំណើនប្រាក់បញ្ញើមាន​ ១៤,៥ភាគរយ។ ប្រព័ន្ធធនាគារនៅកម្ពុជាបច្ចុប្បន្ន គឺមានធនាគារពាណិជ្ជ៥៩, ធនាគារឯកទេស ៨,​គ្រឹះស្ថានមីក្រូហិរញ្ញវត្ថុទទួលប្រាក់បញ្ញើ(MDI)៤ ,  គ្រឹះស្ថានមីក្រូហិរញ្ញវត្ថុមិនទទួលបប្រាក់បញ្ញើ(MFI) ៨៥,  គ្រឹះស្ថានភតិសន្យាហិរញ្ញវត្ថុមាន១៣, គ្រឹះស្ថានឥណទានជនបទមាន១១២, អ្នកដំណើរការតតិយភាគីមាន៤, គ្រឹះស្ថានផ្តល់សេវាទូទាត់សងប្រាក់មាន២៩, ក្រុមហ៊ុនចែករំលែកព័ត៌មានឥណទាន(CBC)មាន១, ការិយាល័យតំណាងបរទេសមាន៥ និងអាជីវកម្មប្តូរប្រាក់មាន ៣ ៤០៧៕ 

ប្រភព​:https://www.thmeythmey.com